日本愛知縣蒲郡市,一名57歲男子喺今個月初確診感染新冠肺炎,醫院要求佢在家自我隔離,點知佢恃住自己無病徵拒絕隔離,仲揚言「要出去散播病毒」,去到市內一間居酒屋同菲律賓酒吧消遣,期間佢向酒吧店員透露自己對新冠病毒檢測呈陽性,驚動店方報警,翌日呢名男子就被強制送入醫院隔離,其後病情急轉直下,延至週三(18日)不治。

居酒屋同菲律賓酒吧之後因此而要停業14日,並接受防疫單位消毒清潔,酒吧一名女職員其後亦確診新冠肺炎。

新聞曝光之後,引嚟日本民眾唔少批評,有人批評佢「反社會人格」、「毫無基本倫理道德觀」,亦有唔少人揣測佢話「要出去散播病毒」,到底係講笑定係專登有意咁做。

《東京新聞》報道,呢名男子平時同父母同兒子一齊住,佢父母因為有發燒同呼吸困難,送去醫院檢測之後確診新冠肺炎,所以佢先接受檢測,或者係因為佢無任何病徵,所以先有恃無恐,無視醫院嘅隔離要求。

原圖:新華社