港大微生物學系講座教授袁國勇及同系名譽助理教授龍振邦,早前就發表咗一篇文章,批評內地民眾忘記2003年沙士嘅教訓,無停止食野味嘅習慣,導致新冠肺炎疫情發生。袁國勇同龍振邦尋日(18日)撤回文章,但袁國勇接受深圳衛視訪問嘅時候,重申佢嘅立場,佢話佢作為一個科學家,最重要嘅係面對真相,佢無時無刻都問自己有咩方法遏制疫情。佢又認為,國家要有謙卑嘅態度,面對自己嘅「短板」,先會令國家興盛、做得更好。

袁國勇話,中國同外國都有做得唔好嘅地方,中國有啲文化唔係咁好,例如食野味,而外國文化就唔戴口罩,結果令疫情變得嚴重。袁國勇強調要尊重專業,當有人為疫情拉響警報,唔好先判斷對方有錯,而係應該當成會人傳人嚟處理,有抱有呢種態度先至有效阻止疫情擴散。袁國勇又提到,美國、英國等歐洲國家唔重視中國嘅疫情,令佢哋而家面對好大問題。

原圖:大公報、商報