內地有個研究指出,感染新冠肺炎嘅機會可能同血型有關,研究數據更顯示A型血嘅人比較容易感染新冠肺炎,而O型血嘅人風險就較低。

 呢個研究由南方科技大學、上海交通大學、武漢中南醫院、武漢金銀潭醫院等8間大學同醫院合作,佢哋採用咗武漢金銀潭醫院、武漢大學人民醫院同深圳市第三人民醫院嘅確診患者,以及多名武漢、深圳嘅一般市民做對比。研究發現,3694名武漢一般市民同金銀潭醫院1775名確診者嘅血型分布比較之下,發現A型血比例喺正常人入面約占32%,但患者入面嘅A型血比例就達37.75%,比較容易受感染。O型患者同正常人嘅比例分別係33.84%25.80%,代表感染風險較低。至於B型同AB型血嘅正常人同感染比例相差不大。另一組深圳嘅調查結果亦顯示,感染新冠肺炎嘅O型血比例明顯比其他血型低。

 研究提醒A型血人士,可能要特別加強個人保護,以減少感染機會。新冠肺炎雖然可能同血型有一定關係,但研究亦強調,結論只係一種假設,感染可能涉及其他機制,仍需進一步研究證明。

圖:環球時報