最近網上流傳一段短片,見到有一名外籍男士喺港鐵車廂入面,拉開自己口罩,用手指將口水抹落扶手上面,令網民譁然,而港鐵亦表示對呢啲妄顧公共衞生嘅行為,予以強烈譴責,仲話已經就事件報警。

涉事嘅外籍男士Joel Werner尋晚(18日)喺社交網站發文,為自己嘅行為向全港市民道歉,佢解釋自己當時係諗住拍一條惡搞短片send俾朋友睇,明白唔應該低估疫情嘅嚴重性,亦唔應該拎嚟開玩笑,仲話已經向警方同港鐵解釋返成件事。佢話自己拍呢條短片前後,都有用酒精搓手液消毒雙手同抹乾淨扶手,無心令其他人感到不安。

原圖:網上片段截圖