大眾控股有限公司尋晚(18日)突然宣布,服務香港超過40年嘅大眾書局,旗下16間分店由今日開始全線結業,受影響員工會根據香港勞工法例遣散。

集團發言人形容呢個係非常艱難嘅決定,又話過去10年香港嘅零售書業一直面對市場結構性挑戰,過去12個月情況持續惡化,導致零售收入嚴重萎縮,但租金同其他成本仍然高昂,喺嚴峻同不明朗嘅經營環境下,唯有忍痛結業。發言人又話,集團未來會將資源集中喺教育出版、電子教學同教育服務,繼續服務香港市民。

大眾書局早前遭到黃埔分店業主,入稟追討今年2月起拖欠嘅租金、管理費等款項超過52萬元,又要求大眾書局歸還舖位。

原圖:RTHK