香蕉我哋就成日食喇,但你哋又知唔知唔同顏色、成熟程度唔同嘅蕉都有唔同功效?香港地捫鮮果早前喺FB就教大家點食蕉,原嚟一條蕉可以同時具有3種不同功效,想幾時食就睇你哋要咩功效喇~

 香蕉啱啱摘落嚟嗰陣,未熟又青bb嗰陣或者半青半黃嘅時候,含有一種類似膳食纖維嘅成分——「難消化性麥芽糊精」,有穩定血糖嘅作用,而且唔易被小腸吸收,但可以被腸道細菌發酵,改善腸道健康。

 至於就嚟熟嘅四分之三黃色同全黃色香蕉,就含有豐富維他命B2B6C,可以促進新陳代謝,具有美白養顏效果。而且呢個時候嘅香蕉味道香濃、口感軟滑,入面嘅鉀同鎂,仲可以消除疲勞,減少運動抽筋機會添~

 最後就係熟晒、帶有啡點嘅香蕉,就含有大量多酚,可以延緩衰老。此外,有研究顯示香蕉啡點越多,免疫活性就越高,當中嘅磷脂質,更有助抑制胃潰瘍,幫助消化。

圖:FB@Del Monte Fresh HK 地捫鮮果