新冠肺炎疫情持續喺美國同歐洲多國蔓延,現時已經暫停比賽嘅美國NBA,再有球員確診。NBA布魯克林籃網隊發表聲明,指佢哋有4名球員確診新冠肺炎,但聲明中未有提及邊啲球員確診,但美國體育媒體《The Athletic》記者Shams Charania披露,呢4名球員包括球星杜蘭特(Kevin Durant),而杜蘭特亦都承認確診,佢表示自己感覺良好,無出現任何病徵,呼籲每個人都要好好照顧自己。

籃網嘅聲明又提到,該隊有球員同職員需要接受隔離及監察健康狀況,正通知有同有關球員接觸嘅人士。而NBA暫停比賽之前,籃網最後一場賽事嘅對賽隊伍係洛杉磯湖人,該隊全隊都會接受病毒檢測。

原圖:FB@Brooklyn Nets