香港中文大學醫學院研究發現,病情有不同嚴重程度嘅新冠肺炎患者,佢哋嘅糞便樣本都帶有新冠病毒,認為檢驗糞便可以係另一種篩查工具。中大醫學院計劃為100名入住檢疫中心嘅密切接觸者進行糞便同深喉唾液化驗,希望搵出無病徵但帶有病毒嘅隱形個案。

中大醫學院早前向14名來自威爾斯親王醫院、聯合醫院嘅新冠肺炎患者,取得超過300個樣本,包括痰、鼻咽液、深喉唾液、血液同糞便,發現痰液嘅新冠病毒含量最高,每毫升中位數含量達320萬。中大微生物學系系主任陳基湘教授仲話,檢測「有痰一定攞痰」,但新冠肺炎患者未必個個都有痰,而研究發現利用深喉唾液進行檢測,有42%機會出現假陰性,佢形容機會「唔算低」,佢指出除咗深喉唾液,糞便可以作為另一種可以喺社區採用嘅早期偵測工具。

原圖:圈傳媒