新冠肺炎肆虐,個個出街都要戴口罩,但長期戴口罩塊面容易生油脂粒同暗瘡,嚴重嘅更會令皮膚敏感。如果化咗妝又長時間戴住口罩,暗瘡嘅情況就會更加嚴重。皮膚科專科醫生陳厚毅就建議,如果因工作需要而要化妝,同時又需要戴口罩嘅話,可以薄施脂粉亦能達到俾人精神感覺嘅效果。

 由於口罩已經遮住大半塊面,可以透過減少化妝次數、盡量避免化濃妝嚟減少阻塞毛孔嘅機會,或者只畫眼線就可以令人顯得精神啲。陳醫生建議,喺屋企或安全環境下,唔需要工作時可以除低口罩,減少喺化妝情況下戴口罩嘅機會。佢補充,化妝之後做足清潔同卸妝步驟非常重要,清潔面上化妝品殘餘物同多餘油脂,就可以減少生暗瘡同油脂粒。

圖:3M,網上圖片