意大利新冠肺炎疫情持續惡化,確診個案已經超過二萬四千宗,醫護人員都做到「踢晒腳」。最近意大利米蘭有一位醫院護士博納里(Alessia Bonari),喺社交媒體上載咗一張收工之後影嘅自拍照、分享佢喺醫院工作嘅情況,結果引嚟大批網民讚好、留言為醫護人員打氣。喺相入面,清楚見到佢臉上嘅口罩痕、眼罩痕,睇見都覺得心痛呀!

呢張相係博納里上個禮拜上載,佢話每當醫護人員著上保護衣之後,就至少連續6個小時無得飲水同去廁所,直至輪班結束,大家都做到成身汗,件衫都濕晒,又好驚自己受到感染,但佢話大家都仍然堅守崗位照顧病人,佢仲話自己仍然熱愛工作,並以身為醫護人員為榮。最後,博納里亦都呼籲民眾盡量留喺屋企,互相保護彼此,唔好白費醫護人員嘅努力。

帖文至今已有超過90萬人讚好,大批網民感謝佢嘅付出,形容佢係意大利人嘅驕傲!

原圖:IG@alessiabonari_