鑒於本港違例泊車情況嚴重,警隊將於聽日(16號)開始試行俗稱「電子牛肉乾」嘅「電子定額罰款通知書先導計劃」,首星期會喺灣仔、深水埗同將軍澳區試行,揸車人士要留意喇。

 所謂嘅「電子牛肉乾」,係由交通督導員使用手機入面嘅應用程式,掃描行車證上面嘅二維碼(QR CODE),確實地點、時間等資料,再用隨身攜帶嘅小型打印機直接列印所發出。警方表示,新一代「電子牛肉乾」印喺熱感紙上,呢種紙放喺陽光下幾個月都唔會花。

香港警務處交通總部署理高級警司聶凱鵾表示,現時嘅行車證上無二維碼,需要透過各車主換證同續證嘅時候換取有二維碼嘅行車證,現時會先透過喺應用程式輸入車牌以取得相關資料。聶凱鵾話,「電子牛肉乾」同傳統「牛肉乾」嘅內容無分別,後續繳費程序亦完全一樣。

圖:香港特別行政區政府-新聞公報,大公網