新冠肺炎持續蔓延,近日開始有運動員「中招」,令多項運動賽事受到影響。日前NBA猶他爵士對奧克拉荷馬雷霆嘅賽事,最後關頭因為爵士球員高拔(Rudy Gobert)對新冠病毒測試呈陽性,突然取消,並呼籲球迷有秩序離開球場。NBA之後發聲明指,高拔當時唔喺球場內,又宣布NBA完成週三賽事之後,會暫停所有比賽直另行通知。

足球方面,意大利足球會祖雲達斯日前亦發表聲明,該隊嘅意大利國腳魯加尼(Daniele Rugani)對新冠病毒測試呈陽性反應,球會會按照法例要求採取隔離措施,包括所有曾經同佢有接觸嘅人。祖雲達斯表示,佢哋喺11日舉行過一課訓練,但皇牌球星C朗拿度就唔喺意大利,路透社引述消息人士報道,所有球員都需要隔離14日,而C朗拿度就繼續留喺葡萄牙家鄉馬達拉島。

而意大利政府早前就已經宣布暫停包括意大利甲組聯賽在內嘅體育運動,直至4月3日,但祖雲達斯下週喺主場舉行嘅歐聯16強第二回合賽事,就未知會唔會如期舉行。

原圖:FB@Daniele Rugani、FB@Rudy Gobert