鑒於今次新冠肺炎疫情持續,全港唔少行業遭受重挫,本地嘅電競行業亦唔例外。本嚟政府2018年撥款1億元俾數碼港發展電競,將數碼港商場改裝成電競場地,上年7月中正式啟用。但係,香港電競總會會長楊全盛就指出,其實由上年7月到依家,取消咗嘅電競比賽最少有50個,令年輕人損失咗多個活動同項目嘅工作職位。

 數碼港電競場地嘅落成,被好多業內行家形容係本港電競業一個好好嘅開始,可以給予香港年輕人更多唔同嘅事業發展機會,去發揮佢哋嘅才能。不過,原嚟電競場地落成之初就已經受上年大大小小嘅社會運動,同埋最近嘅新冠肺炎疫情影響,取消咗多場電競比賽。楊全盛話,香港有一間好大嘅電競公司,最多人嗰陣有8、90人,就係因為呢幾件事打擊,呢班好有活力、才能嘅年輕人,無辦法都要向現實低頭。

圖:圈傳媒