踏入春天,又嚟到賞花嘅季節,不過今年受新型冠狀病毒肺炎疫情影響,港人出門旅遊嘅意欲下降,雖然無得出國賞花,但香港有唔少賞花嘅好地方㗎!就好似粉嶺中心近祥華邨一帶,最近就有幾棵紅花風鈴木開花,花朵呈紫色或粉紅色,非常鮮艷,吸引咗唔少途人影相打卡。除咗粉嶺中心,葵芳邨亦都有種植紅花風鈴木,大家都不妨去觀賞、影相。

除咗紅花風鈴木,黃色嘅黃花風鈴木亦都好靚㗎,喺深水埗南昌公園種嘅黃花風鈴木最近亦都開咗花,吸引唔少市民去到影相。除咗南昌公園,香港仔海濱公園 、啓德郵輪碼頭公園 、九龍灣公園同嘉道理農場等地方,都有種植黃花風鈴木㗎。

原圖:網上圖片