新型冠狀病毒肺炎肆虐,市民都盡量減少去一啲人多地方,有部分就選擇行山呼吸一下新鮮空氣。不過行山還行山,千祈唔好留低自己嘅垃圾呀!海洋生態研究組織OceansAsia負責人Gary Stokes,日前同佢嘅團隊响索罟群島進行海洋垃圾研究,喺沙灘上執到至少70個口罩,佢警告市民喺街上或者行山嘅時候唔好亂咁棄置口罩,因為口罩有機會被雨水沖落河流、排水渠再沖出大海,海豚、海龜如果唔小心食咗呢啲口罩,卡住喺消化系統內,有機會導致死亡。

Gary Stokes就話口罩有好多潛在來源,索罟群島位於香港西南面,按照目前香港受東或東南風影響,估計東面嘅長洲、南丫島、石鼓洲焚化爐建築用地,都可能係呢啲口罩嘅源頭。佢又話有唔少海上建築物用地都習慣將廢物掉落海,佢唔排除口罩係來自工地。

原圖:FB@Gary Stokes