東京奧運仲有4個幾月就舉行,但至今仲未有電視台買入奧運賽事轉播權。港協暨奧委會副會長霍啟剛日前建議特區政府「出手」買入轉播權,再分銷俾唔同電視台,做到「全城睇奧運」。霍啟剛仲話,其實日本同南韓等地,亦都係由公營電視台買入轉播權,再同地區電視台合作播放。

霍啟剛提到唔少好處,佢話如果政府買入轉播權,相關比賽片段日後就可以提供俾學校做教材,另一方面亦可以幫助喺今次新型冠狀病毒肺炎疫情中受重創嘅商場同飲食業。霍啟剛又話,喺奧運唔止一兩個運動員有機會贏到獎牌,如果無得睇就有啲可惜。

政府暫時仲未回應建議,但霍啟剛就已經寫信俾特首林鄭月娥,希望短期內能夠同官員會面,爭取政府快啲行動。

原圖:奧運官方圖片