如果有親人感染新型冠狀病毒肺炎,相信大家一定會非常擔心,喺內地一間醫院就發生咗一件令人動容嘅事。話說有一位由廣東去武漢提供醫療援助嘅護士劉錦鳳,有一日工作嘅時候,要聯絡病人家屬,佢打通電話向對方表示自己係醫院打嚟,話口未完對方就請求佢唔好講,話自己心臟受唔住,求佢唔好講「壞消息」,呢位病人家屬仲喊咗出嚟。

劉錦鳳就叫呢位病人家屬放心,打嚟希望佢幫病人拎一啲生活用品去到醫院。呢位家屬聽到之後,聲都震晒咁講多謝,劉錦鳳就安慰佢病人而家情況好好,叫佢唔使擔心。

劉錦鳳受訪時表示,始終病人被隔離,家人無得探病,所以佢哋嘅擔心同不安係可以理解嘅。劉錦鳳又話,經歷呢件事之後,更加感受到佢今次嚟武漢嘅使命,有責任努力照顧好每一個人、送佢哋出院。

原圖:大公報