面對香港持續口罩短缺嘅情況,唔少有心人都計劃喺香港設置廠房生產口罩,紡織及製衣界立法會議員鍾國斌最近接受傳媒訪問嘅時候,亦透露即將推出可重用60次嘅環保口罩,定價每個100元,預計下個月會有30萬個推出市場,首2萬個「只派不賣」。

鍾國斌話佢計劃推出三款由唔同防菌天然物料製成嘅口罩,分別係禾素、甲殼素同銀離子,全部具備殺菌功效。鍾國斌仲話,因為細菌接觸到呢啲防菌布料都會被殺死,所以市民只需要用番梘或者梘液手洗10分鐘左右,清走口罩上嘅殘留物質,晾乾之後就可以重複使用。

鍾國斌提到,佢曾經同傳染病專家討論過,對方認為呢啲口罩足以應付日常生活接觸到嘅飛沫,佢正打算拎呢批口罩去美國做病毒檢測認證,睇下可唔可以防到H5N1同沙士等病毒。

原圖:FB@鍾國斌