而家新型冠狀病毒疫情肆虐,不過好多小朋友都唔鍾意戴口罩,瑪嘉烈醫院兒童及青少年科顧問醫生關日華就俾咗啲小貼士大家,等家長可以為小朋友做好防疫措施。

第一,要為小朋友揀選適合嘅口罩。關醫生就提到,有唔少家長以為防禦性越高嘅口罩對小朋友越好,但關醫生就指出,例如N95呢類過濾性咁高嘅口罩,會令人體呼出嘅二氧化碳較難排出,小朋友戴得耐會感到頭暈,所以佢建議只需要戴外科口罩就可以減低飛沫傳播風險。另外關醫生亦提醒,要留意小朋友戴口罩之後有無覺得侷促,口罩有無破損、太鬆,或者有明顯飛沫、異味,就需要除咗佢。

第二,就係以循序漸進嘅方式引導小朋友戴口罩。關醫生建議,可以縮短小朋友戴口罩嘅時間,例如15分鐘,之後先再慢慢增加時間,等小朋友習慣,又或者可以同小朋友玩扮演醫生、病人遊戲,等佢哋由遊戲中適應。

關醫生亦提醒,小朋友經常周圍掂、周圍摸,家長要常備消毒酒精搓手液,為自己同小朋友清潔雙手。小朋友嘅玩具要每日至少清潔一次,亦要選擇一啲開胸衫,盡可能避免著「過頭笠」,因為病菌有機會喺除衫嗰陣帶到臉上,家長真係要小心留意喇。

原圖:微博@Chormay