抗疫期間最緊要勤洗手,酒精消毒搓手液可以話係市民出街必帶嘅裝備之一,但市面上林林總總嘅搓手液亦未必全部都可以有效消毒,一個唔覺意反而消毒不成變養毒,甚至播毒添!

由於新冠肺炎肆虐,消毒用品幾乎被搶購一空,而近期坊間唔少地方都有幾十蚊至一百蚊不等嘅無貼標籤、唔知咩牌子嘅酒精搓手液賣。不過有報道就抽樣拎呢啲搓手液去檢驗,唔驗由自可,一驗真係嚇死人!呢啲不明來歷嘅搓手液唔單止殺唔到菌、消唔到毒,入面更含有大腸桿菌同金黃葡萄球菌,有啲樣本嘅含菌量更加比屋企嘅廁板仲要高!有醫生指,如果市民用呢啲含菌搓手液後再觸碰雙眼,可以引致角膜炎,若果直接用手接觸食物食落肚,更加會將細菌帶到腸臟,有機會引發急性腸胃炎添。所以,大家千祈唔好為求「買個安心」而亂買不明產地、無貼標籤嘅搓手液,否則只會越消越毒,甚至將病菌散播開去!

圖:Greenpeace