新型冠狀病毒持續蔓延,唔少人都會用各種消毒用品、稀釋漂白水清潔家居,不過屋企有養寵物嘅人要留意喇,原來有部分清潔劑係會損害貓狗健康,甚至危及佢哋性命!

愛護動物協會(SPCA)早前就指出,一般常用嘅清潔劑包括漂白劑﹑氨、乙二醇醚或甲醛等成分,有機會令寵物患癌症、貧血,或導致肝腎受損,而貓科動物缺少咗一種負責催化肝臟排毒嘅肝酵素UGT,對藥物、化學物非常敏感,無法分解清潔劑中有毒嘅化學成分。就算多次「過水」,殘留物亦有機會積聚喺地板或者罅隙之中,寵物有機會唔小心吸入,長遠造成損害,如果主人發現有唔妥,就要快啲帶寵物睇獸醫喇。

SPCA建議,主人可以用一啲稀釋咗嘅白醋(白醋同水比例1:1)、食用梳打等天然產品,或者係用醋製成嘅環保清潔劑嚟清潔屋企,咁就可以保障寵物安全喇。

原圖:安妮貓窩