最近外國興起一種叫「3人跳」(Tripping Jump Challenge)嘅挑戰,呢類段片仲瘋傳入香港。但千祈唔好以為呢個係咩好玩嘅挑戰,其實佢係一個整蠱遊戲,後果可以導致腰背、頭部受傷,嚴重嘅甚至死亡!

3人跳挑戰嘅短片通常係3個青少年企喺鏡頭前,佢哋聲稱會一齊跳起,但當企中間嘅人跳起之後,旁邊2個就會即刻出腳踢跌中間嗰個,令佢當場向後跌倒,非常危險!呢個惡作劇早喺舊年11月喺巴西出現,當地一個16歲少女被2名友人踢倒,頭部嚴重受傷送院,最終不治。另外亦有來自德州嘅母親話,佢個仔因為被呢個挑戰捉弄而出現腦震盪,佢更呼籲「不要對任何人作出這樣的行為」。

圖:網上圖片