喺近排一罩難求嘅情況下,唔少人都想要一個可重用嘅抗菌口罩,宜家終於有望可以買到啦~

以色列嘅新創公司Sonovia,早前已經研發出一種利用超音波技術,喺醫療紡織品嘅表面,導入氧化鋅奈米顆粒,令紡織品帶有抗菌保護功能。呢個技術源於一種叫做「氣穴」嘅物理現象,目前可抵抗6種細菌,包括大腸捍菌,其發明原意係希望令醫院內用嘅紡織品,例如牀單、防護衣、口罩甚至眼罩,都可以抗菌抗毒,減低病人嘅感染機會。而經初步實驗,呢啲經處理嘅紡織品,就算用75℃高溫清洗100次,依然可以保持抗菌、抗毒能力,非常耐用。但係呢項技術暫時未測試可唔可以抵禦新型冠狀病毒,加上仲未商業化,難以大量投產。不過實驗室目前嘅材料可以即刻生產5000至1萬個可以反覆使用嘅口罩。Sonovia更表示願意協助中國,為前線醫護人員提供相關裝備。

另一間以色列新創公司Argaman,亦都研發緊可重用嘅抗菌抗毒口罩Bio-Block,口罩嘅布料可以殺死外來同使用者噴出嘅細菌。據報,呢隻口罩係由一種多功能物料CottonX製成,唔單止可以防火,抑制病毒,更加喺經過100次家用式清潔、或者50次工業式清潔之後依然能夠抵抗大腸捍菌。Bio-Block口罩有望喺2個月之後推出市場,首批2萬個口罩,每個定價為50美元(約388港幣),暫定喺Amazon發售。

圖:Argaman