而家香港口罩短缺,每次有商鋪宣布有口罩賣,都引嚟大批市民晨咁早就出嚟排隊攞籌,見到有老人家排得咁辛苦,睇見都覺得心痛。港姐冠軍馮盈盈最近就同朋友收集咗幾百個口罩,自發去到大坑西邨派俾老人家,真係人又靚、心地又好。

事後佢喺社交媒體分享自己2003年沙士嗰陣,只係一個小四學生,當時都唔係好知道咩事,17年後今日見自己有能力去幫助別人,就決定出分力同朋友湊齊幾百個口罩,自發派俾舊屋邨老人家。佢慨嘆「看見很多行動不便的老人家,應門到開門都要幾分鐘時間,更遑論去排隊買口罩」,仲話呢場仗唔知幾時完結,呼籲大家「一人走多一步,互相關懷,多一份愛、多一份團結」,度過呢次疫症。

原圖:FB@Crystal Fung 馮盈盈