喺內地,浙江大學醫學院附屬第四醫院一名叫陳穎嘅年輕女護士,原本同男友準備喺今日情人節登記結婚,但因為突如其來嘅新型冠狀病毒疫症,打亂晒佢哋嘅計劃。

喺年初一,陳穎被緊急叫返去醫院接受培訓,隨即就要照顧新冠病毒病人,當時佢男友同佢媽媽知道之後都喊咗出嚟,媽媽仲勸佢唔好冒險。陳穎講咗句「既然選了這份職業,這種時候總有人要站出來」,講完就返醫院開工。

陳穎响隔離病房做咗11日之後,先至可以同男友見面,佢哋戴住口罩、隔住密封玻璃門,四目交投,用手機對話。佢哋無法擁抱對方,於是隔住口罩同玻璃,親吻對方,最後二人約定等到陳穎出返嚟,第一時就去領結婚証。

原圖:微博@中國精致生活-物道