自從武漢、湖北省爆發新型冠狀病毒之後,有唔少國家都決定由當地撤僑。印度早前就由武漢撤走咗600幾名印度人,佢哋返抵印度之後隨即進入隔離營隔離,並等待對新型冠狀病毒檢測結果,最終發現全機600幾人無一感染病毒,令網民感到驚奇,唔少網民仲講笑話要食多啲、買多啲印度咖哩添。

之不過,印度外交部發言人庫馬爾早前感謝中方協助撤僑嘅時候提到,現時仲有80幾名印度人留咗喺武漢,包括10名原本要上機但因為無法通過健康檢查程序嘅印度人。而且印度現時有3宗確診個案,都係由中國返去嘅印度人,即係話印度人唔係特別健康,更加唔關印度咖哩事,大家就唔好亂搶咖哩喇。

原圖:下厨房,網上圖片