VR除咗用嚟打機、娛樂之外,仲可以有唔同嘅用途。喺韓國,就有一間公司用VR體驗,幫助一個4年前失去女兒嘅媽媽,喺虛擬世界同女兒再聚,走出陰霾。

呢位媽媽叫張智星(Jang Ji Sung譯音),4年前女兒娜燕(Nayeon)因為血癌離世,呢幾年張智星一直都好唔開心,韓國一間虛擬技術製作公司知道呢個情況之後,就安排VR技術人員向張智星收集娜燕嘅相、聲音等數據,再搵一個相似嘅小朋友嚟做模仿娜燕舉動,用咗8個月時間製成一條娜燕同媽媽相聚嘅影片。

張智星戴上VR裝置,隨即喺一個公園度見到女兒娜燕,即刻流唔住流淚,佢攬住女兒講出壓抑心底多年嘅說話:「媽媽好想再見你」。娜燕向媽媽送上一朵鮮花,又話自己以後都唔會再患病,之後佢哋去到一個野餐場地,張智星為娜燕補慶祝生日、唱生日歌,最後張智星睇住娜燕入睡,結束呢次再聚。

原圖:YT@MBClife