隨住武漢肺炎疫情擴散,全港中小學、幼稚園同特殊學校由農曆新年假期之後一直停課至今,最快都要3月2日先復課,隨時會再延長。雖然學生呢段時間無得返學,但喺屋企一樣可以利用一啲網上資源繼續學習,善用時間。香港教育城一直以嚟都提供唔同嘅電子教學資源,而家為咗支援停課期間嘅學習需要,只要免費申請公眾帳戶,就可以使用遊戲化學習平台「小校園」、「知文識趣」同「English Campus」,同埋响「教城書櫃」免費訂閱超過 600 本電子書。

「知文識趣」係一個中文自學平台,囊括超過 300 個遊戲同練習,學生可以輕鬆學習閱讀理解策略,強化語文能力,掌握古文知識;而「English Campus」就係一個英文自學平台,學生可以觀看中英新聞庫同互動影片,緊貼社會脈搏,訓練聽、說、讀嘅能力,就好似最近武漢肺炎、籃球明星高比拜仁意外逝世等新聞影片亦上載到呢個平台上,非常update。至於「小校園」就係為小學生提供超過50個小遊戲,涵蓋中文、英文、數學、常識等多個學科,學生可以透過唔同遊戲去儲虛擬金幣,為角色添置服裝同飾物。

除咗透過一啲遊戲學習,學生亦可以喺「教城購物廣場」揀選免費電子書,喺「教城書櫃」電子閱讀器閱讀相關書籍,「教城書櫃」設中英文介面,並支援手機同平板電腦,方便學生閣讀。

詳情可以瀏覽香港教育城「停課不停學」網頁:https://www.hkedcity.net/home/zh-hant/learning

原圖:香港教育城 HKEdCity