今日係情人節,有情人就梗係sweet sweet,不過對於啱啱遭受情傷嘅單身一族嚟講,今日簡直就係攞景嚟增興。為咗等呢班備受前度傷害嘅人,有個「報復」前度嘅機會,美國德州聖安東尼奧動物園特登推出一項特別服務。呢個服務就係俾人用前度個名去命名一隻曱甴或老鼠,再將呢隻曱甴或老鼠拎去餵動物,等動物幫你「處決前度」,一解被前度傷害嘅怨氣!

想要得到呢項服務,只需要俾5美元(約39港幣),就可以「買起」一隻以前度個名命名嘅曱甴,由園方將佢拎去餵雀鳥。都係解唔到心頭之恨?咁就可以俾25美元(約194港幣),得到一隻老鼠做前度替身,然後俾園內嘅爬蟲類碎屍萬段、大塊朵碩。園方更會喺情人節呢日,直播成個餵食過程,等大家親眼見證自己個「前度」被「處決」,一解心頭之恨。而「認領」咗曱甴或老鼠嘅人,更可獲得由園方發出嘅證明書,上面大字標明已經將前度「就地正法」,認真過癮!

圖:san antonio zoo