武漢肺炎喺內地持續蔓延,多個國家、組織都紛紛向內地尤其是疫症重災區湖北省,捐贈物資。日本漢語水平考試(HSK)事務局早前亦都向湖北省捐贈物資抗疫,喺物資箱上印有「山川異域,風月同天」8個字,引起內地網民熱烈討論。

唔講唔知,「山川異域,風月同天」呢8個字原來係同中日兩國交往嘅一段歷史有關嘅。呢句說話係源於宋朝初年,出現喺僧人贊寧所寫嘅《宋高僧傳》入面。話說喺唐朝年間,日本曾經10幾次派出遣唐使團,嚟到中國學習文化,帶回日本推動經濟同社會發展。當時嘅日本宰相長屋王對文藝、佛法相當有研究,好羨慕唐朝嘅佛教文化,於是就派人送咗1000件袈裟俾中國僧人,袈裟上繡住「山川異域,風月同天,寄諸佛子,共結來緣」,高僧鑒真睇見之後覺得好感動,應邀去日本弘揚佛法,抵達之後受到熱烈歡迎,更被譽為「律宗之祖」、「文化之父」。

日本漢語水平考試(HSK)事務局係中國國家漢語國際推廣領導小組辦公室喺日本成立嘅漢語水平考試官方機構,考試係由北京語言大學漢語水平考試中心設計,用嚟測試母語唔係漢語嘅人士嘅漢語水平。事務局喺寄出嘅物資箱印上「山川異域,風月同天」,感動唔少網民,獲網民讚賞有學養。

原圖:微博@扎寶