好多後生仔女都唔想幫人打一世工,希望自己做老闆,一開始都會用低成本嚟創業。而英國呢個後生仔當初試吓用5000蚊嚟創立咗自己嘅公司,專門分銷電子零件,結果只係用咗短短7年,就變成宜家年均營業額超過1000萬嘅公司,認真勵志!

據英國傳媒報道,呢位來自英國約克郡嘅26歲男仔Ben Ewart,喺7年前,即係佢19歲嗰年用500英鎊(約港幣5100)創立電子業務公司Switch Electronics。Ben當時直接由中國製造商購買廉價電子零件,再運返英國賣,佢嘅標價比當地各大街小巷嘅零售商都要平,結果成功俾佢創立咗自己嘅公司。Switch Electronics宜家喺英國薩頓科爾菲爾德有一個大型倉庫,產品銷往全球130個唔同國家,仲會喺網上平台包括eBay、Amazon同自家網站,銷售電纜組件、電線、傳感器等各類型嘅工具同產品。Ben嘅公司喺2019年嘅銷售額更達到100萬英鎊(約1000萬港幣),佢仲話希望之後可以開多個大倉庫,請多啲員工翻嚟幫手,目標係將公司每年嘅銷售額提高至1500萬英鎊(約1.5億港幣)添。

圖:Ben Ewart