G.E.M.(鄧紫棋)最近寫咗首新歌,讚揚所有喺呢場疫症當中默默付出嘅人,形容佢哋係「平凡天使」。喺新歌《平凡天使》MV入面,有女護士因為要照顧病人,由年初一開始一連7日都無返過屋企,女護士嘅丈夫帶埋9歲嘅女,嚟到醫院為佢送上餃子、離遠「隔空擁抱」,兩母女一邊「擁抱」一邊喊,場面令人悲傷。

除咗前線醫護人員,亦有無數嘅市民用唔同方式做後援,支持前線人員打贏呢場仗,包括有位武漢嘅少女每日為醫院煮飯800份,有男人送500個口罩去派出所,有對母女將幾十支消毒液送到鐵路站等等,呢啲舉動睇落好似好微不足道,但係正如《平凡天使》歌詞所講:「世界因為你,在痛裡有感動。」

呢個MV放上YouTube一日左右,就已經有超過60萬人睇過,而且一片好評,有網民就話睇到呢個MV之後覺得好感動,令人明白世界上有好多善良嘅人,「或許我們就只如那茫茫宇宙中的渺小星星,不過卻散發著光芒的一顆星,你我都能幫助疫情,都能當無名英雄,也不怕只是微弱的救助。」

《平凡天使》MV:

原圖:GEM鄧紫棋@Youtube