武漢肺炎持續擴散,喺重災區武漢,前線嘅醫護人員可以話係做到「踢晒腳」,有內地網民就喺微博上傳一班醫護人員攰到喺醫院地下或者凳瞓覺嘅相,可見佢哋嘅工作係幾咁忙碌。

除咗長時間工作,醫療物資亦相當缺乏,醫護人員唯有著住尿片工作,甚至乎成日都唔飲水,減少去廁所次數、減少更換防護衣。唔少網民都好心痛同感謝醫護人員嘅付出,叫佢哋做「英雄」,形容佢哋係披上鎧甲,企喺病人前面同病毒、同死神戰鬥。有網民亦都話,見到班醫護人員咁辛苦,令佢哋更珍惜而家擁有嘅舒適生活、少啲抱怨。

原圖:微博@央視新聞