香港武漢肺炎確診個案持續上升,市民紛紛搶購口罩,避免受到感染。最近就有人發現有黑心商人賣二手口罩,有網民就諗出各種方法阻止口罩被回收再賣,包括剪爛口罩、用筆喺口罩上寫字,甚至用火燒毀口罩等等。不過有醫生指出,破壞口罩反而會增加感染傳染病嘅機會,最好嘅處理方法都係棄置喺垃圾桶,並且洗手。

喺公私營急症室任職超過16年嘅「長頸鹿醫生」,最近响佢Facebook專頁發文,呼籲市民唔好自行銷毀口罩,佢舉例如果用鉸剪剪爛口罩,雙手同鉸剪都會被污染,同樣用筆喺口罩上寫字,亦都會令雙手同筆被污染,所以絕對唔建議呢啲做法,反而簡單啲將口罩掉入垃圾桶同洗手,就係最好嘅做法。佢又講笑咁話,如果真係有人收集用過嘅口罩,相信佢唔使幾日就會病死。

台灣深切治療部醫生陳志金亦都話,口罩嘅作用係幫助使用者擋住含有病毒嘅飛沫,剪爛口罩會令雙手有機會接觸到呢啲飛沫,增加染病風險。

原圖:facebook