相信唔少人細個嗰陣都幻想過同動物溝通,想知道啲動物諗緊啲乜。聽落好似好天荒夜談,但最近澳洲悉尼大學一位博士生格林(Alexandra Green)嘅研究發現,牛同牛之間會討論食物、天氣等等唔同話題,又為以叫聲表達佢哋嘅情緒。格林就話希望未來可以建立一部牛語音字典,翻譯牛嘅各種叫聲,幫助農民調整牛隻嘅狀態,改善動物福利。

格林早喺2017年開始呢項研究,佢同佢嘅團隊錄低咗13隻荷蘭乳牛幾百次叫聲,送到去法國俾生物聲學專家用軟件進行分析。研究設定咗5種主要情境,分別係發情期、等待飼料前、被拒餵食、被迫同牛群分開,以及同牛群分開兼無法互望,頭2種屬正面情緒,後3種屬負面情緒。研究結果發現,牛嘅叫聲喺唔同情境都好穩定,又會表達出興奮、鼓勵、求歡或苦惱等情緒同牛群溝通。格林又話,乳牛之間經常交流,佢哋傾一啲開心嘢嘅時候,例如食物,聲音會比較洪亮,而談及天氣嘅時候就相對低沉。有關研究結果已經响英國《自然》(Nature)期刊刊登。

原圖:新華社