喺內地,現年46歲嘅李華喺1991年開始患強直性脊椎炎,令佢嘅上半身不斷向下彎曲、臉部緊貼住大髀,上下半身就好似對摺一樣,長年都唔可以挺直個人,令佢嘅起居生活大受影響。直至去年6月,深圳大學總醫院安排同佢進行矯正手術,喺之後半年做完4次手術,李華相隔28年終可以再次「挺起胸膛」。

李華喺18歲開始發病,最初係腳關節同膝頭痛,之後條腰都開始無力,要彎住條腰嚟行,無幾耐連條頸都開始彎埋。李華一家試過周圍借錢去睇醫生,但因為病情太複雜而醫唔好,佢就一直用感冒藥止痛。响2018年某一日,李華食完感冒藥之後吐咗好多血,於是就去大城市睇病,但因為手術太難而被醫院拒絕。到咗2019年5月,李華因為長期蜷曲,腹部同胸膛長期無法清洗令污垢堆積,形成壓瘡並發出惡臭。壓瘡令李華非常痛苦,於是李華媽媽就帶佢去深圳求醫。

喺深圳大學總醫院,醫生同護士先醫治佢嘅壓瘡,又用汽球協助李華鍛鍊肺功能,過咗兩個月之後先至開始接受手術。醫院脊柱骨科主任陶惠人就話,呢次手術難度非常高,要打斷3節彎曲嘅脊椎骨,重新拼接成直線,有機會導致癱瘓,陶惠人甚至形容呢次手術有「珠穆朗瑪峰般的難度」,最終經歷4次手術同肌肉訓練,令李華奇蹟地再次挺直身體,好似正常人一樣行走。

手術成功之後,李華被問到有咩心願,佢話最想見到媽媽個樣,雖然咁多年嚟媽媽都喺佢身邊照顧佢,但就一直都睇唔到佢個樣。李華又用口琴吹咗首《世上只有媽媽好》送俾佢媽媽,感謝媽媽多年嚟嘅照顧。

原圖:中國青年報