正所謂後生可畏,永遠都可以挑戰極限!英國蘇格蘭有三個熱愛划艇嘅兄弟,上個月參加咗「泰斯卡威士忌挑戰」越洋划艇比賽,只係用咗35日就橫越大西洋、由歐洲划艇到北美,創下世界紀錄。睇佢哋到達終點嗰陣遊刃有餘嘅悠閒樣,估計下次可以挑戰橫跨太平洋添!

 呢幾兄弟平均年齡得20幾歲,組成「划手兄弟(BROAR)」團隊參賽,同時亦為兒童健康組織籌款。佢哋上月由西班牙加那利群島出發,划艇划咗35日又9個鐘零9分鐘,就橫跨大西洋,抵達北美洲國家安提瓜,打破咗原本耗時41日嘅三人划艇紀錄。雖然幾兄弟途中遇上暈浪、電力不足、風暴、脫水等難關,仲因手機電線被鹽分侵蝕導致失去任何娛樂,但最終三兄弟互相支持、自娛自樂,將難關一一克服。據主辦方喺社交網站話,三兄弟抵埗嗰陣依然精神奕奕,仲好悠閒咁彈奏住風笛衝線添,狀態fit爆!

圖:IG@broaratlantic