記憶力驚人,睇過嘅書可以過目不忘我哋就聽得多,原嚟健力士世界紀錄有一項叫做「用開篇第一句話連續辨識最多出版書籍」嘅記憶類紀錄,而近排就被一個叫洛爾(Monty Lord)嘅14歲少年打破咗,創下憑住書本嘅第一句而連續、準確咁辨認出129本世界名著,真係後生可畏啊!

洛爾之前透過美國耶魯大學嘅遙距課程學習心理學之後,對記憶背誦好感興趣,就喺擔任電視製作人嘅父親建議下挑戰世界紀錄。佢運用視覺記憶法,喺3個星期內背誦200本書嘅開首第一句。結果到咗挑戰當日,洛爾坐喺學校教室接受挑戰,由父親朗讀書本首句,佢就靠呢句辨認出自邊部作品,最終成功連續認出129本世界名著,當中包括《哈利波特:神秘的魔法石》、《小飛俠》、《少年Pi的奇幻漂流》、《Lolita》、《飢餓遊戲》、《鐵甲奇俠》等。洛爾仲話,今年將再下一城,挑戰背誦書籍嘅開頭幾行。

圖:SWNS