澳洲山火持續幾個月都仲未平息,悉尼大學教授迪克曼估計,大火已經造成10億隻動物死亡,網上有唔少受災動物嘅相片同影片,亦有唔少人好熱心咁照顧受災動物。之不過,最近就有樹熊因為人類餵飲水嘅時候姿勢不當而死亡,真係無妄之災。

外國媒體報道,大火肆虐澳洲維多利亞州東部吉普斯蘭嘅時候,一隻名為亞尼嘅樹熊被救起,當時亞尼手腳輕微燒傷,無生命危險,但有位好心民眾用水樽餵水俾佢飲嘅時候,意外導致水份進入肺部,引發肺炎,最終死亡。

當地動保團體「動物界野生動物庇護所」(Animalia Wildlife Shelter)喺社交媒體發文,呼籲民眾應該用正確方法餵動物飲水,又話樹熊平時好少飲水,通常都係透過食樹葉嚟補充水份,飲水嘅時候都係臉部向下,用舌頭舔少量嘅水。負責人托馬斯重申,唔係叫人唔好俾水樹熊飲,如果要為樹熊補充水份,最好嘅方式係將水倒入碗,放喺佢哋面前等佢哋可以用臉部向下嘅方式舔水飲。

原圖:IG@bikebug2019