世上唔止得媽媽好嘅,爸爸一樣咁偉大!澳洲有位單親爸爸,曾因為工作同照顧自閉症兒子,搞到壓力太大要靠煙酒減壓。但佢其後發現,自己同個仔相處時間太少,所以決定辭咗高薪工作、變賣財產,買咗一架旅行車同兒子遊歷澳洲,希望可以幫仔仔走出「舒適圈」。

呢位爸爸原本係一位IT技術員,但為咗同仔仔多啲時間相處,於是辭工兼賣曬啲家當,買咗部旅行車改裝之後同仔仔環遊澳洲。遊歷咗18個月之後,因為旅行車壞咗,加上缺乏資金而被迫中止。不過,兩父子對遊歷依然念念不忘,又省吃儉用喺2017年10月再買過部旅行車,踏上征途。宜家爸爸途中靠幫人做維修、寫旅遊網誌賺錢,同時邊旅行邊教仔仔學新知識。透過旅行,兩父子嘅感情更深厚,而仔仔亦變得敢於嘗試新事物,學會同其他人相處,爸爸更加話:自閉症兒童嘅父母唔應該將小朋友保護喺「舒適圈」入面,而係應該鼓勵佢哋克服恐懼。

圖:FB@Cam and Jaidens' Excellent Adventure