唔少學生都會趁暑假,做吓實習,攞吓工作經驗。喺美國就有一位响太空總署(NASA)做實習嘅17歲學生,返工3日就發現咗一粒行星,成為佢意想不到嘅額外收穫,得到一個與眾不同嘅實習經歷。

呢位實習生叫克基埃爾(Wolf Cukier),原本係一位紐約高中生,去年暑假佢喺升上大學之前,去到NASA嘅戈達德太空科學研究所做實習,喺佢第3日返工嗰陣,整理利用「凌日系外行星勘探衞星(TESS)」照片收集返嚟嘅「食雙星」數據時,發現一個雙星系統「TOI 1338」訊號,佢開頭以為係星食(stellar eclipse)現象,但時機唔脗合,先知原來係一粒行星嚟。克基埃爾日前接受訪問,佢話自己無諗過發現任何嘢,而家一諗到自己嘅發現咁有科學價值、咁多人研究,就覺得好正。

呢粒行星係首粒被TESS發現嘅環聯星運轉行星(circumbinary planet),距離地球大約1300光年,體積係地球嘅6.9倍。雖然呢粒行星係由克基埃爾發現,但就唔會以佢個名嚟命名,而係依照TESS編號系統,命名為「TOI 1338b」。

原圖:YouTube@Inside Edition,NASA