細個飲汽水,除咗可樂之外,雪碧都係另一個熱門選擇,而佢嘅綠色樽經典設計,可以話係深入民心。不過可口可樂公司早前宣布,下個月開始樽裝雪碧將會改用透明膠樽,而深藍色膠樽嘅玉泉(Schweppes)有氣水同青檸味有氣水,亦都會响7月轉用透明膠樽。可口可樂中國有限公司香港、台灣、澳門及蒙古區總經理及副總裁葛佩琪解釋,要將有色膠料變返做可重用嘅透明膠料比較困難,所以轉用透明膠樽,方便回收,循環再造。

除咗產品轉用透明膠樽,可口可樂公司响2018年12月開始喺香港設置加水站,鼓勵市民自備水樽加水,至今已經設置200個加水站,估計每年可以節省咗108萬個膠樽。另外,可口可樂公司亦都响去年9月開始,設置8部智能飲品膠樽收集機,至今已經收集超過80萬膠樽。可口可樂公司就話,今年就會增設更多加水站同膠樽收集機,繼續鼓勵市民自備水樽同支持回收膠樽工作。

原圖:The Coca-Cola Company