細細個屋企人就教落,喺出面千祈唔好亂飲嘢!喺英國,就有人喺電視節目上試飲一支陳年嘅「酒」,但點知後來驗出呢支「酒」原來唔係酒,而係尿嚟,諗起都覺得嘔心呀!

事緣喺2016年,玻璃器具專家麥康奈爾(Andy McConnell)喺英國廣播公司(BBC)電視節目《鑒寶路秀》上面,為一支長年埋喺泥土下嘅酒樽估值,當時麥康奈爾就話呢個酒樽有150年歷史,又用針筒由酒樽內抽出少量嘅「酒」出嚟品嚐,當時佢話啲酒顏色好啡,估計係砵酒或者紅酒,形容充滿鐵鏽味。

3年之後,節目主持布魯斯(Fiona Bruce)就向麥康奈爾公布英國羅浮堡大學科學家對呢支「酒」嘅化驗結果,酒樽入面嘅釘可追溯至1840年代,而入面嘅液體其實係尿,只有少量嘅酒同頭髮,麥康奈爾聽到之後非常尷尬!布魯斯之後解釋,呢個酒樽係舊時啲人為咗避開女巫而製造嘅護身符,埋喺泥土就可以驅走惡魔同詛咒。

原圖:BBC