買傢俬真係要小心選擇,尤其是屋企有小朋友,一旦揀錯傢俬,隨時發生家居意外,整親小朋友!喺2017年,美國加州2歲男童杜德克(Jozef Dudek)喺家中,被一個冧落嚟嘅三層抽屜櫃壓死。抽屜櫃嘅零售商宜家家居(IKEA),早前同意向男童父母賠償4600萬美元,相當於約3.6億港元,成為美國一童過失致死最高和解金嘅個案。

呢款抽屜櫃被指同至少9宗兒童死亡、10幾宗受傷個案有關,意外通常都係發生喺兒童嘗試拉出櫃桶,然後導致成個櫃冧落嚟。杜德克嘅媽媽就話,當初無諗過一個2歲兒童可以令到一個30吋高嘅櫃冧落嚟,令佢窒息,認為意外隨時發生响其他兒童身上。

IKEA同家屬達成和解後發聲明,表示和解安排無法扭轉呢宗悲劇事件,佢哋會繼續積極地、合作地解決呢個非常重要嘅家居安全問題,並表示深切哀悼。根據傳媒翻查IKEA香港官網,發現香港都有出售同款抽屜櫃,但就講明需要固定喺牆上,大家真係要小心留意同安裝喇!

原圖:Insider, IKEA官網