英國哈里王子同夫人梅根,前年結婚後曾多次傳出同其他王室成員不和嘅消息,尋日佢哋突然透過Instagram宣布,會由王室高級成員身份退落嚟,並努力達致財政獨立。聲明提到,呢個決定係經過多個月嘅考慮,強調會繼續支持女王,佢哋日後會平衡喺英國同北美嘅居留時間,令佢哋可以喺王室傳統下,養育兒子阿奇,以及有空間等佢哋一家展開新生活。

白金漢宮表示理解哈里王子意願,但指事態複雜,要從長計議。英國廣播公司(BBC)就報道,哈里王子同夫人梅根發聲明前,無徵詢過其他王室成員意見,英女王伊利沙伯二世同威廉王子都係唔知情,而其他王室高級成員亦感到傷心。BBC王室記者戴蒙德就話,王室官員喺回應事件嘅聲明入面,用上「失望」(disappointed)嘅字眼,認為係代表王室內部真正嘅諗法,對二人事前唔先徵詢意見嘅做法感到難受。

原圖:英國王室Facebook