雖然話救火、救人係消防員嘅工作,但可以得到被救者嘅感謝同樣係一件值得開心嘅事!就好似台灣高雄有兩位消防員,突然收到被救者嘅禮物,又被封「貴人」,真係好surprise又有愛。

呢兩個消防員叫葉冠愷、李瑋浤,有一日突然聽到廣播:「葉冠愷及李瑋浤兩名貴人,請到值班台領回你的包裹」。佢哋一頭霧水,直至領咗包裹先發現入面原嚟有4罐茶葉同一封感謝信。信入面話自己嘅兒子係舊年9月份喺情人碼頭摔車受傷,當時就係葉冠愷同李瑋浤負責將佢兒子送院,途中仲不斷安慰、鼓勵佢,令遠在百里嘅父母安心、寬慰,於是送上茶葉多謝佢哋。

不過呢,基於公務員唔可以收受餽贈,茶葉真係只能心領,剩係收咗感謝信留念。

圖:高市消防局第6大隊