相信大家都聽過畢加索呢位畫家個大名,而佢一幅作品响上月28日喺英國倫敦泰德現代美術館,被人撕爛,實在令人震驚。

呢幅被人撕爛嘅作品,係畢加索1944年响法國巴黎創作嘅《女人半身像》(Bust of a Woman),有成75年歷史,估值2000萬英鎊(約2億港元)。1944年畢加索創作呢幅畫嘅時候,巴黎正處於納粹德國佔領區內,而呢幅半抽象畫入面身穿綠衣同戴住帽嘅主角,就係攝影師馬爾,據講馬爾亦都係畢加索嘅情人。

撕爛畢加索呢幅《女人半身像》嘅元兇,係一位來自英國倫敦西北部嘅20歲男子馬西(Shakeel Ryan Massey),佢撕爛呢幅畫之後好快落網,館方就話已經收起呢幅畫等專家評估,但就未有公布受損情況。而馬西案件响上月30日提堂,佢否認控罪,現時被拒絕保釋,預料將會拘留至今個月底審訊。

原圖:artfund, artdependence