睇電視劇都見到入面嘅醫生好偉大,成日都將病人嘅病情擺喺第一位,而唔顧自己嘅健康。原嚟呢個情景唔單止係電視劇情節,現實生活亦一樣見到!內地江蘇有位叫做劉磊嘅醫生,幫病人做手術之前已經覺得腹痛,但佢就忍痛堅持為病人做完手術,係個真正嘅仁醫! 劉磊係江蘇淮安一位肝膽胰外科醫師,本身患有泌尿結石,喺上個月28號,當劉磊準備為病人做手術之前,就覺得腹部傳嚟陣陣疼痛,但考慮到病人嘅情況比較危急,於是自己打咗支止痛針就入手術室。劉磊忍住痛楚開工,病人嘅手術好成功,但劉磊嘅腹部就再次作痛,情況比手術前更嚴重。佢嘅同事即刻察覺唔妥,幫劉磊做檢查,發現劉磊腹部有1cm結石同大量積水,如果唔及時治療,會引起尿源性膿毒血症(敗血症),嚴重嘅甚至會致命。最後劉磊都未嚟得切除手術袍,就被同事送上手術台急救,好彩劉磊吉人有天相,經同事搶救之後宜家已經慢慢康復,仲話:「我所做的事情只是醫生這個職業所應該做的事情,病人的利益要放在第一位,這也是成為醫生那一刻,醫生誓詞的內容。」 圖:看看新聞