冬天令人更熱愛被竇,有冇諗過如果返工可以攤喺張床度就好呢?而家可以願望成真啦!印度有一間健康用品公司招聘「睡眠實習生」,只要連續100日每日瞓夠9個鐘就可以有10萬盧比(約港幣$11000),真係瞓喺度就有糧出。 

呢間公司Wakefit講到明睡眠實習生嘅工作只係「瞓」,仲話瞓得越沉,表現越好。佢哋要求應徵者要「對瞓覺充滿熱誠」,隨時隨地都可以投入於睡眠當中。

 此外,呢份工仲要求應徵者有大學學位,上堂瞓覺時數亦可作為參考經驗;可以快速入睡;可連續睡眠8個鐘;可以指出各項用品點樣改善睡眠質素;勸阻組員一切妨礙睡眠嘅活動;可不受任何外界影響入睡;自律地記錄睡眠習慣;視瞓覺比網絡世界重要;重視睡眠配件如睡衣、床單等細節。

 原圖:Wakefit

 #圈新聞 #瞓覺專員 #睡眠質素 #筍工