好多食店為咗宣傳會舉辦各式各樣活動,有抽獎,亦有比賽,但亦要量力而為。台灣一名急症室醫生就喺佢嘅FACEBOOK專頁「Dr. E 小兒急診室日誌」分享宗病例。有一名17歲嘅台灣中學生同朋友一齊參加食店舉辦嘅「無敵麻辣麵比賽」,競食勁辣嘅麻辣麵。搞到要開刀做手術。

個男仔眼見一齊參賽嘅朋友一個個中途放棄,佢繼續堅持食完最後一啖麵,為嘅係贏取獎金$500台幣(約$130港幣),點知佢飲牛奶解辣時突然腹部劇痛暈倒。呢名男生被送到急症室後一直表示自己上腹疼痛,更出現排尿困難,經斷層掃描後發現佢嘅胃部被內容物過度撐大,而膀胱亦因無法排尿而脹大。

幸好經過治療後男生嘅情況大有改善,出院前醫生問佢:「用健康換$500蚊獎金,值得咩?」呢位男生竟然回答:「唔止$500蚊,仲有嗰碗麵都免費。」真係令醫生無言,忍唔住出聲提醒佢逞強有機會導致胃穿孔要接受緊急手術:「你嗰啲量力而為退賽嘅朋友先係聰明人。」

原圖:「Dr. E 小兒急診室日誌」FACEBOOK、網絡圖片

#圈新聞 #麻辣麵